FDA မှ ဒုတိယကြီးကြပ်ရေးမှူး အမျိုးသမီးအား သတ်ပြီး အလောင်းစွန့်ပစ် လူသတ် မုဒိမ်းမှု သတင်းထုတ်ပြန်ချက် အပြည့်အစုံ

FDA မှ ဒုတိယကြီးကြပ်ရေးမှူး အမျိုးသမီးအား သတ်ပြီး အလောင်းစွန့်ပစ် လူသတ် မုဒိမ်းမှု သတင်းထုတ်ပြန်ချက် အပြည့်အစုံ

FDA မှ ဒုတိယကြီးကြပ်ရေးမှူး အမျိုးသမီးအား သတ်ပြီး ဒဂုံမြို့သစ် ( မြောက်ပိုင်း ) မြို့နယ်၊ ငမိုးရိပ်ချောင်းကူး တံတားဘေးတွင် အလောင်းစွန့်ပစ်ထားသော လူသတ်မုဒိမ်းမှုမှ ပြစ်မှုကျူးလွန်သူအား ရန်ကုန်တိုင်းဒေသကြီးရဲတပ်ဖွဲ့က ၄ ရက် အတွင်း ဖော်ထုတ်ဖမ်းဆီးရမိ

ရန်ကုန်၊ ဇန်နဝါရီလ ၂၄

အစားအသောက်နှင့်ဆေးဝါးဦးစီးဌာန ( FDA)မှ ဒုတိယကြီးကြပ်ရေးမှူး မရွှေရည်ဝင်း(ခ) ရွှေရည် ( ၂၅) နှစ်အား သတ်ပြီး ဒဂုံမြောက်မြို့နယ်၊ (၃၃) တိုးချဲ့ရပ်ကွက်၊ ငါးမာန်အောင်ဘုရားလမ်း၊ ငမိုးရိပ်ချောင်းဘေး၊ ဖူဆယ်မိုးလုံ လေလုံ အားကစားရုံအနီး ချောင်းရေကျော် တံတားအစပ်ကုလားမန်ကျည်းပင် အောက်တွင် အလောင်း ပစ်ထားခဲ့သည့် အမှုမှ ပြစ်မှုကျူးလွန်သူအား ရန်ကုန်တိုင်းဒေသကြီးရဲတပ်ဖွဲ့က (၄)ရက်အတွင်း ဖော်ထုတ်ဖမ်းဆီး ရမိခဲ့ကြောင်း သိရသည်။

ဖြစ်စဉ်မှာ ဇန်နဝါရီလ ၂၁ ရက်နေ့ နံနက် ၀၇၃၀ အချိန်ခန့်က ဒဂုံမြောက်မြို့နယ်၊ (၃၃)တိုးချဲ့ရပ်ကွက်၊ ငါးမာန်အောင် ဘုရားလမ်း၊ ငမိုးရိပ်ချောင်းဘေး ၊ ဖူဆယ်မိုးလုံလေလုံ အားကစားရုံအနီး ချောင်းရေကျော်တံတားအစပ် ကုလား မန်ကျည်းပင်အောက်တွင် အမည်မသိ အမျိုးသမီးတစ်ဦးမှာ ဒဏ်ရာများဖြင့် သေဆုံးနေကြောင်း သတင်းရရှိသဖြင့် စုံစမ်းဖော်ထုတ်နိုင်ရန် ဒဂုံမြို့သစ် (မြောက်ပိုင်း) မြို့မရဲစခန်း (ပ) ၈၃ / ၂၀၁၈ ၊ ရာဇသတ်ကြီး ပုဒ်မ ၃၀၂ ဖြင့် အမှုဖွင့် စုံစမ်းဆောင်ရွက်ခဲ့ပါသည်။

အမှုမှာ အများပြည်သူစိတ်ဝင်စားသည့် ထူးခြားသော မှုခင်းတစ်ခုဖြစ်သဖြင့် အမှုမှန် အမြန်ဖော်ထုတ်ရန်နှင့် ပြစ်မှု ကျူးလွန်သူအား အမြန်ဖော်ထုတ် ဖမ်းဆီးရမိရေးအတွက် တိုင်းဒေသကြီးရဲတပ်ဖွဲ့မှူး ဦးစီး၍ ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ မှုခင်းအကူဌာနစု၊ အုပ်ချုပ်မှုအကူတပ်ခွဲ၊ အရှေ့ပိုင်းခရိုင်ရဲတပ်ဖွဲ့မှူး၊ အနောက်ပိုင်း ခရိုင်ရဲတပ်ဖွဲ့မှူးနှင့် ခရိုင်မှုခင်းနှိမ်နင်းရေးဌာနစု၊ ဒဂုံမြို့သစ်(မြောက်ပိုင်း) မြို့နယ်မှ ရဲတပ်ဖွဲ့ဝင်များ ပါဝင်သော အထူးအမှုစစ်အဖွဲ့ကို ဖွဲ့စည်းပြီး စုံစမ်းစစ်ဆေးရရှိသည့် သတင်းအချက် အလက်များနှင့် သဲလွန်စအထောက်အထားများကို အခြေပြု စုံစမ်းဆောင်ရွက်ခဲ့ပါသည်။

အမှုမှ သေဆုံးသူ အမျိုးသမီးအား အတည်ပြုနိုင်ရေးအတွက် အဖွဲ့များခွဲ၍ စုံစမ်းခဲ့ရာ သေဆုံးသူမှာ ဒဂုံမြို့နယ်၊ ဦးဝိစာရရပ်ကွက်နေ မရွှေရည်ဝင်း(ခ)ရွှေရည် (၂၅) နှစ်ဆိုသူဖြစ်ကြောင်း၊ နေပြည်တော်တွင် တာဝန်ထမ်းဆောင်နေရာမှ ဇန်နဝါရီလ ၁၉ ရက်နေ့က ရန်ကုန်သို့ ပြန်လာခဲ့ပြီး ဇန်နဝါရီလ၂၀ရက်နေ့တွင် အလုပ်ကိစ္စဖြင့် နေအိမ်မှ ထွက်သွားရာမှ ပြန်လည်ရောက်ရှိခြင်းမရှိသဖြင့် ဖခင်ဖြစ်သူ ဦးကျော်စိုးက ဒဂုံမြို့မ ရဲစခန်းတွင် လူပျောက်အမှတ်စဉ် ( ၁ / ၂၀၁၈ ) ဖြင့် တိုင်တန်းထားသူဖြစ်ကြောင်း အတည်ပြုရရှိခဲ့ပါသည်။

သေဆုံးသူ၏ ဆွေမျိုးများ၏ ထွက်ဆိုချက်အရ သေဆုံးသူ မရွှေရည်ဝင်း (ခ)ရွှေရည် ဝတ်ဆင်ထားသော ပလက်တီနန်ဆွဲကြိုး ၁ ကုံး၊ ပလက်တီနန်ခြေကျင်း ၁ ခု၊ ပလက်တီနန်နားဆွဲသီး ၁ ရံ၊ SAMSUNG Galaxy A5 အမျိုးအစား ရွှေရောင်လက်ကိုင်ဖုန်း ၁ လုံးနှင့် ပိုက်ဆံအိတ် ၁ လုံး
ပျောက်ဆုံးနေကြောင်း သိရှိရသဖြင့် အဆိုပါ ပစ္စည်းများနှင့် စပ်လျဉ်း၍သေဆုံးသူ ကိုင်ဆောင်သည့် Sansung Glaxy A5 ဖုန်းအမျိုးအစားလာရောက် ရောင်းချခြင်း၊ ပြုပြင်ခြင်းတွေ့ရှိပါက သတင်းပေးပို့ရန် တယ်လီဖုန်းပြုပြင်ဆိုင်များနှင့် ရောင်း/ဝယ်ဆိုင်များသို့ ဖြန့်ဝေပေးထားသည့်အပြင် ရွှေထည် ပစ္စည်းနှင့် ပလက်တီနန် ရောင်း/ဝယ် ဆိုင်များ ၊ အပေါင်ဆိုင်များသို့လည်း သတင်းစုံစမ်းပေးရန် ဖြန့်ဝေထားရှိခဲ့ပါသည်။

မရွှေရည်ဝင်း (ခ)ရွှေရည်အား မသေဆုံးမီ ည ၁၉၄၃ အချိန်တွင် ကမာရွတ်မြို့နယ်၊ လှည်းတန်းစင်တာတွင် ဈေးဝယ်ရန် ရောက်ရှိနေကြောင်း၊ အချိန်နောက်ကျနေ၍ ကားငှားပြန်လာခဲ့ရန် ဖခင်ဖြစ်သူ ဦးကျော်စိုးနှင့် ဖုန်းအဆက်သွယ်ရကြောင်း၊ အငှားကားဖြင့် ပြန်လာစဉ် ၁၉၅၀ နာရီအချိန်တွင် မရွှေရည်ဝင်း (ခ) ရွှေရည်၏ သူငယ်ချင်းဖြစ်သူ မင်းဇော်အောင်က အိမ်ပြန်ရောက် မရောက်ဖုန်းဖြင့် ဆက်သွယ် မေးမြန်းခဲ့ကြောင်း စုံစမ်းသိရသည်။

သေဆုံးသူမှာ အငှားကားဖြင့် ပြန်လာခဲ့ကြောင်း သုံးသပ်ရရှိသဖြင့် Control Centre မှ တစ်ဆင့် အငှားယာဉ် ဖြတ်သန်းသွားလာသည့် နေရာများကို စုံစမ်းရှာဖွေခဲ့ပြီး ရရှိသည့် သတင်းအချက်အလက်များကို စိစစ် အတည်ပြုခဲ့ပါသည်။ ဇန်နဝါရီလ ၂၄ ရက်နေ့ ၁၄၀၀ နာရီအချိန်တွင် မင်္ဂလာတောင်ညွန့်မြို့နယ်၊ ယုဇနပလာဇာရှိ ဖုန်းပြုပြင်ရေးဆိုင်သို့ သတင်းပေးရန်ဖြန့်ဝေ ထားသည် SAMSUNG Galaxy A5 အမျိုးအစား ရွှေရောင်ဖုန်း တစ်လုံးကို အမျိုးသားတစ်ဦးက ဆော့ဝဲအသစ်တင်ပေးရန် လာရောက်ပြုပြင်ကြောင်း အရှေ့ပိုင်းခရိုင်ရဲတပ်ဖွဲ့သို့ ဆက်သွယ်အကြောင်းကြားခဲ့သဖြင့် အမှုဖြင့် မသင်္ကာသူ မျိုးဇော်ဦး(၂၇)နှစ်၊ ယာဉ်မောင်း၊ (ဘ) ဦးသန်းဇော် ၊ ပတ္တမြားလမ်း၊ (၃၃)ရပ်ကွက်၊ ဒဂုံမြို့သစ်(မြောက်ပိုင်း)နေသူအား ဖမ်းဆီးထိန်းသိမ်းခဲ့ပြီး သက်သေခံဖုန်းကို သိမ်းဆည်းကာ ရန်ကုန်တိုင်းဒေသကြီး ရဲတပ်ဖွဲ့မှူးရုံးသို့ ခေါ်ယူစစ်ဆေးခဲ့ပါသည်။ Control Centre မှ အငှားယာဉ်ဖြတ်သန်းသွားလာသည့် လမ်းကြောင်းမှ ရရှိသော သတင်း
အချက်အလက်များနှင့် သိမ်းဆည်းရမိသော တယ်လီဖုန်းနှင့် တိုက်ဆိုင်စစ်ဆေးခဲ့ရာ မျိုးဇော်ဦးမှ ပြစ်မှု ကျူးလွန်ခဲ့ကြောင်း ထွက်ဆိုခဲ့သည့်အပြင် မျိုးဇော်ဦး၏ ခန္ဓာကိုယ်အား စစ်ဆေးခဲ့ရာ ရင်ဘတ်တွင် ကုတ်ခြစ်ဒဏ်ရာများတွေ့ရှိသဖြင့် ပြစ်မှုကျူးလွန်ခဲ့သည်မှာ မှန်ကန်ကြောင်း အတည်ပြုနိုင်ခဲ့ပါသည်။

ပြစ်မှုကျူးလွန်သူ မျိုးဇော်ဦး၏ ထွက်ဆိုချက်အရ ဇန်နဝါရီလ ၂၁ ရက်နေ့ညနေ ၁၉၄၀ နာရီအချိန်တွင် 7E/6169 ယာဉ်အမှတ် တိုရိုတာဗစ် အမျိုးအစား အငှားမော်တော်ယာဉ်ကို မောင်းနှင်လာစဉ် ကမာရွတ်၊ လှည်းတန်းစင်တာ အနီး အင်းစိန်လမ်းမပေါ်တွင် အမျိုး သမီးတစ်ဦးမှ ဒဂုံမြို့နယ်၊ မင်းမနိုင်ရပ်ကွက်သို့ ပို့ဆောင်ပေးရန် ၂၅၀၀ ကျပ်ဖြင့် ငှားရမ်းသဖြင့် တင်ဆောင်၍ မောင်းနှင်လာခဲ့ကြောင်း၊ မင်းမနိုင်ရပ်ကွက်အတွင်း နေအိမ်အနီး ရောက်ရှိစဉ် သေဆုံးသူမှ မော်တော်ယာဉ်အတွင်း ယာဉ်ငှားခပေးခဲ့ရာ အဲယားကွန်ဖွင့်ပေးခဲ့ရသဖြင့် ငွေ ၁၀၀၀ ကျပ် ပိုမိုတောင်းခံသည့် ကိစ္စဖြင့် စကားများခဲ့ကြောင်း၊ ကားရပ်ပြီး ကားအတွင်းမှပင် နောက်ခန်းသို့ ကူးကာ အမျိုးသမီး၏ လည်ပင်းကို ညစ်ပြီးကားပေါ်တွင် ပါလာသည့် ဝက်အူလှည့်ဖြင့် လည်ပင်းသို့ ထိုးလိုက် သဖြင့် အမျိုးသမီးမှာ သတိမေ့သွားကြောင်း၊ ၄င်းလည်း ကားကို ဒဂုံမြို့သစ်(မြောက်ပိုင်း)သို့ ပြန်လည်မောင်းခဲ့ရာ (၃၃)ရပ်ကွက်၊ ငါးမာန်အောင် ဘုရားလမ်းပေါ် ဖူဆယ်ဘောလုံးကွင်းအနီး လမ်းဘေး အမှောင်ရိပ်တွင် သတိမေ့ နေသည့် အမျိုးသမီးအား သားမယားအဖြစ်ပြုကျင့်ခဲ့ကြောင်း၊ အမျိုးသမီး ဝတ်ဆင်လာသည့် ပလက်တီနန်ဆွဲကြိုး၊ နားကပ်၊ ခြေကျင်း၊ ပိုက်ဆံအိတ်နှင့်ဖုန်း တို့ကို ယူဆောင်ခဲ့ကြောင်း၊ အမျိုးသမီးမှာ သတိမေ့နေရာမှ သေဆုံးသွားသဖြင့် အလောင်းကို ဒဂုံမြောက်မြို့နယ်၊ (၃၃) တိုးချဲ့ရပ်ကွက်၊ ငါးမာန်အောင် ဘုရားလမ်း၊ ငမိုးရိပ်ချောင်းဘေး ၊ ဖူဆယ်မိုးလုံလေလုံ အားကစားရုံအနီး ချောင်းရေကျော်တံတားအစပ် ကုလားမန်ကျည်း
ပင်အောက်တွင် ပစ်ထားခဲ့ကြောင်း ပေါ်ပေါက်ပါသည်။

ပြစ်မှုကျူးလွန်သူ၏ ထွက်ဆိုချက်အရ ၄င်းယူဆောင်လာသည့် ပလက်တီနန် ဆွဲကြိုးနှင့် နားကပ်ကို တောင်ဥက္ကလာပမြို့နယ်၊ (၄) ရပ်ကွက်ရှိ နန္ဒဝန်ဈေးမှ လည်းကောင်း၊ သေဆုံးသူ၏ ပိုက်ဆံအိတ်၊ မှတ်ပုံတင်၊ လိုင်စင်ဓာတ်ပုံ၊ ATM ကဒ်တို့ကိုဒဂုံမြ်ို့သစ်(မြောက်ပိုင်း)မြို့နယ်၊ အမှတ် ၃၄ ရပ်ကွက်၊ ပိထောက်မြိုင်(၃)လမ်းနှင့် ပျဉ်းမမြိုင်လမ်းထောင့်ရှိ ချုံပုတ်အတွင်းမှလည်းကောင်း ၊ သေဆုံးသူ၏ ဖိနပ်၊ FDA ဝန်ထမ်းကဒ်နှင့် အသုံးအဆောင်ပစ္စည်းများ၊ City Mart မှဝယ်ယူလာသည့် ဘောင်ဘီရှည် (၁)ထည်တို့ကို (၃၅)ရပ်ကွက်ရှိ ပင်လုံလမ်းနှင့် ဗိုလ်မင်းရောင် လမ်းထောင့်ရှိ ရေမြောင်းအတွင်းမှ လည်းကောင်း၊ ပြစ်မှုကျူးလွန်သူ အခင်းဖြစ်စဉ်က ဝတ်ဆင်သည့် အကျီင်္နှင့် ပုဆိုးတို့ကို ၄င်းနေထိုင်သည့် ဒဂုံမြို့သစ်(မြောက်ပိုင်း) မြို့နယ်၊ ပတ္တမြားလမ်း၊ ၃၃ ရပ်ကွက်မှ လည်းကောင်း အသီးသီးသိမ်းဆည်းရရှိခဲ့ပြီး ကျန်ရှိ သက်သေခံပစ္စည်းများ သိမ်းဆည်းရမိရေး ဆက်လက်ဆောင်ရွက်လျက်ရှိပါသည်။

ရန်ကုန်တိုင်းဒေသကြီးရဲတပ်ဖွဲ့အနေဖြင့် ရက်စက်ထူးခြားသည့် လူသတ်မုဒိမ်းမှုကို ကျူးလွန်သူ မျိုးဇော်ဦး အား ထိရောက် ပြစ်ဒဏ်ရရှိရေး ဥပဒေအရ ဆက်လက်အရေးယူဆောင်ရွက်သွားမည်ဖြစ်ကြောင်း၊ ယခု အမှုအား ဖော်ထုတ်ရာတွင် ရဲတပ်ဖွဲ့နှင့်အတူ ပူးပေါင်းကူညီဆောင်ရွက်ပေးသည့်ပြည်သူများအား ရန်ကုန်တိုင်းဒေသကြီး ရဲတပ်ဖွဲ့မှ ကျေးဇူးတင်ရှိပါကြောင်းနှင့် ပြည်သူများအနေဖြင့် အငှားယာဉ်များ ငှားရမ်းစီးနင်းရာတွင် ယခုဖြစ်စဉ်ကို သင်ခန်းစာယူ သတိပြုသွားလာကြပါရန် အသိပေးဖော်ပြအပ်ပါသည်။

Yangon Police
https://www.facebook.com/yangonpolice

Share this: